Les mots surlignés font l'objet d'une note
1Monsieur, jay receu avecq une infinité d’ayse et de contentement la lettre quil vous a pleu mescrire pour y avoir veu
2la continuation de votre bonne santé et celle de madame. Je prie Notre Seigneur vous y maintenir
3aussi longuement que je désire. Je vous remercie très humblement la peyne qu’avés prins à me faire
4tenir les lettres de mon filz d’Ourches, lesquelles mont osté d’une bien grand peyne pour le long temps
5quil y avoit que n’en avoye poinct receu, ensemble des aultres de faveur qu’escrivés à monsieur de
6Ferron, ambassadeur pour sa magesté à Rome. Jay depesché notre greffier de ce lieu en Avignon pour
7les faire tenir avecq celles que jay trouvé dans le paquet de mondit filz, dressantes à monseigneur le cardinal
8de Lorraine par la voie du banquier qui a prins charge de laffaire que nous y avons. Je ne
9vous diray pour recompence de ce bon ofice, sinon que nous vous en demeurerons perpetuellement obligés.
10Je partz ce jourdhuy de ce lieu avecq madamoyselle d’Ourche ma filhe, pour mener ma filhe de Penet
11en son mesnage. De là, nous en alons droict à St Gervays d’où madite filhe d’Ourche partira dans quelques
12jours après pour s’en aller devers vous et madicte dame. Je faictz beaucoup de regret que je ly ay
13tant faict tarder ce voiage. Nous sommes très tous en en fort bon pourtement la grâce à Dieu. Je nalongeray
14ceste cy que pour saluer vos bonnes grâces par mes très humbles recommandations, priant Notre Seigneur
15vous donner
16Monsieur, en toute prospérité très longue et contente vie. A La Motte, le VIIIe juillet 1572.
17Votre plus humble à vous faire service
18Loyse du Fay
19Je prie Dieu de bon cueur vouloir conduire monsieur d’Evènes et monsieur de Laval et que leur aler, sejour et retour soit
20accompaigné dautant de bonne santé que je leur en souhaite.
21Monsieur, après avoir escript la présente, j’ay receu en ceste
22ville de Dye ung aultre paquet de lettres de mondit filz
23que vous mavés faict tenir ; de quoy je vous
24remercie très humblement. J’y ay faict passer votre
25laquais afin de vous rapourter comme nous y sommes tous
26arrivés en bonne santé